Missiya
Asosiy missiya Oʻzbekistonning islohotlar va rivojlanish dasturini ilgari surishdan iborat boʻlib, unga siyosat bilan bogʻliq tadqiqotlar va ekspertizalarni qoʻllab-quvvatlash, oʻtkazish, qolaversa, oqilona muloqotni ragʻbatlantirish hamda Oʻzbekistonga aloqador masalalar boʻyicha faoliyat yurituvchi mutaxassislarning malakasini oshirishga koʻmaklashish orqali erishiladi.
Dastlabki shart sharoitlar
Soʻnggi paytlarda Oʻzbekiston Markaziy Osiyoning eng tez rivojlanayotgan mamlakatlaridan biriga aylandi. U oʻz iqtisodiyotini jadallashtirish, davlat institutlarini modernizatsiya qilish va mintaqaviy hamda xalqaro miqyosda oʻz ishtirokini kuchaytirish uchun muhim islohotlarni amalga oshirmoqda. Uning islohotlar dasturi biznes muhitini yaxshilash, taʼlim imkoniyatlarini kengaytirish, infratuzilma muammolarini hal qilish va shahar boshqaruvini takomillashtirish kabi koʻplab sohalarni qamrab oladi. Biroq bu keng koʻlamli islohotlarni amalga oshirish murakkab jarayon, chunki ildiz otgan byurokratik amaliyotlar, cheklangan resurslar va tez oʻzgarishlarni siyosiy hamda ijtimoiy barqarorlik bilan muvozanatlash zarurati tufayli taraqqiyot jadalligi pasayishi mumkin.
Oʻzbekiston oʻzining ichki va tashqi siyosatidagi ustuvor yoʻnalishlarini qayta koʻrib chiqayotgan bir paytda, Markaziy Osiyo dasturi (CAP) Oʻzbekiston uchun oʻzining alohida loyihasini ishga tushirmoqda.
Dasturning ustuvor yoʻnalishlari
Ushbu dastur Oʻzbekiston islohotlari uchun markaziy ahamiyatga ega boʻlgan va AQSH manfaatlariga mos keladigan quyidagi beshta asosiy yoʻnalishga eʼtibor qaratadi:
- Biznes muhiti va iqtisodiy erkinlik
- Taʼlim islohotlari va salohiyatni oshirish
- Urbanizatsiya, yoʻl harakati xavfsizligi va infratuzilmani rivojlantirish
- Xotin-qizlarning iqtisodiy huquq va imkoniyatlarini kengaytirish
- Demografik tendensiyalar va ularning iqtisodiy oqibatlari.
Oʻzbekiston uchun moʻljallangan bu dastur tadqiqot nashrlari, tahliliy maʼlumotnomalar, multimedia kontenti va jamoatchilik ishtirokidagi tadbirlar orqali chuqur tahlil va amaliy hamkorlik markaziga aylanishni maqsad qiladi.
Tadqiqotlar va nashrlar
Mahalliy va xalqaro ekspertlarning chuqur tahlillari, amaliy tavsiyalari va xilma-xil qarashlarini oʻz ichiga olgan tadqiqot ishlari hamda tahliliy maʼlumotnomalarni tayyorlash.
Tadbirlar
Markaziy Osiyo, AQSH va boshqa mamlakatlarning manfaatdor tomonlari oʻrtasida mazmunli muloqotga hissa qoʻshuvchi panel munozaralar, seminarlar va davra suhbatlari kabi onlayn va oflayn tadbirlarni oʻtkazish.
Yillik simpoziumlar: Fikr almashish, hamkorlikni rivojlantirish va islohotlarga innovatsion yondashuvlarni namoyish etish uchun siyosiy arboblar, shuningdek, ilmiy doiralar va xususiy sektorning yetakchi vakillarini bir joyga toʻplash.
Stipendiyalar
Oʻzbekistonlik olimlar va amaliyotchilar uchun tadqiqotlar oʻtkazish, salohiyatni oshirish va gʻoyalar almashish imkoniyatlarini taqdim etish orqali dastur samaradorligini oshirish.
Dastur oʻzaro anglashuv va hamkorlikni rivojlantirish uchun hamkorlarning keng doirasi – Markaziy Osiyoda faoliyat koʻrsatuvchi olimlar va amaliyotchilar, amerikalik va yevropalik olimlar, siyosatchilar va xususiy sektor vakillarini jalb etishni koʻzda tutadi. Mahalliy tajriba va istiqbollarga alohida eʼtibor qaratgan holda, ushbu dastur islohotlar nafaqat tashqi tavsiyalar asosida, balki Oʻzbekiston fuqarolarining tushunchasi, tajribasi va intilishlarini hisobga olgan holda shakllanishini taʼminlashga harakat qiladi.
